Gaur egun, K.OS 2026ko estreinaldiari begira sormen eta produkzio fasean dago, eta 2027tik aurrera programazioetarako zabalik dago.

Circuito Estatal “España en Libertad. 50 años” zirkuituan hautatutako proiektua.

K.OS gorputzaren bidez gogoratzeko beharretik sortzen da. Obra honek Gernikako bonbardaketa eta Picassoren Gernika-ren iruditeria hartzen ditu kubismoa ere abiapuntu gisa, indarkeriari, erbestealdiari, galerari eta giza erresistentziari buruz hausnartzeko.

Zirku garaikidea, dantza eta jatorrizko musika uztartuz, iragana eta egungo gatazkak lotzen dituen esperientzia bisual eta emozionala proposatzen du.

SINOPSIA:

K.OS-en, artista talde batek bizia ematen die Picassoren Gernika koadro ospetsuko irudietan inspiratutako sinbolo biziei: usoa, zezena, zaldia, soldadua, haurra besoetan duen ama besteak beste.

Inoiz bidali ez ziren gutunak aurkitzen dituen gazte batekin hasten da. Gutun bakoitzak galera, ihesa, gerra eta erresistentziaren istorio bat erakusten du. Obrak mugimendu akrobatikoa eta narrazio poetikoa uztartzen ditu, gris eta ñabardurez beteriko zuri-beltzeko estetika batean. Gerraren izuaren eta bizirik iraun zutenen bidaia emozionala.